NITI AAYOG scheme kapachunji aphan Dr. Himanta long-eh kesom

TET satlang council pensi enpo lapen grade III pen IV aphan SIU ave lo: Dr. Himanta Biswa Sharma

Diphu, Arkoi 9: Government of India NITI AAYOG pen Karbi Anglong arlo kaprek kaprek scheme keklemji aphan kado kave sika crore 200 atangka panong lo. Laso ateng kechengsi aphan (1st phase) sika lac 9411 atangka nangpale.  Laso angbong pen KASA kaparlo Diphu along akimi sports Complex aphan sika lac 4500, Donkamokam along akimi sports Complex aphan sika lac 2500, Hamren along akimi central hall Complex aphan sika lac 971.50, hithi ajo tovar kaselamji aphan sika lac 339.50, water supply lapenkachepangthir aphan sika lac 200, Diphu River Cleanin aphan sika lac 800, rong along thiri heihui adim kaselamji aphan sika 45 lapen rong along market shed heihui kaselamji aphan sika lac 55 pathiklo. Lahai kado kave asai keklem kapachunji aphan pusi pini KASA pathu aklam along State minister Dr. Himanta Biswa Sharma pen MLA Sum Ronghang athengno long-eh som lo.
Long-eh som det aphi KASA pathu aklam along amat rat amaipi ingni, MLA Sum Ronghang kachepahemphu amai along state finace, education, health & family  welfare heihui minister Dr. Himanta Biswa Sharma, Jagiroad constituency MLA Pius Hazarika Dr. Numal Momin, MLA Joyram Ingleng lapen MLA Dr. Mansing Rongpi, Karbi Anglong Autonomous Council CEM Tuliram Ronghang, EM do-an lapen KAAC principal secretary anparta kaprek kaprek atum mai along chetong dun.
BJP atum ningje chotche akam ta klem pu angtheksi Karbi Anglong arlo lapuson kethe dung kethe dung scheme kapachunji sai deng lo pusi BJP East Karbi Anglong a meiphu Roton Teron mai along jai.
Minister Dr. Himanta Biswa Sharma akerap ajoine Karbi Anglong Autonomous Council adilung atum Delhi damsi India Prime Minister Narendra Modi aphan chetong dam lo. Laso kachetong dam ahut Karbi Anglong arat kachesong Autonomous state alam pen chenglok, MoU, Mo Salam heihui chingki chethan tekang lo. La-an chot kali kaprek kaprek kachingthur kenangji alam heihui ta chingki chethan tekang longlo. Laso atengsi government of India pen sika crore 200 one time special package nangpilo pusi KAAC CEM Tuliram Ronghang mai along than.
Karbi Anglong arlo kedo kaprek kaprek ratchari asong atum thangbakbe alam penang pachethang thap lo, seta lahai atum kethan thap alam arju nangne, kevangji arni lason thakthak kachingthur avarsai kelong bomji aphan rat atum kacherap kacheto kenangsot pusi CEM Tuliram Ronghang jai. Council kilik alongta rat atum kacherap kacheto lapen ahirjume nang kipi dun kenangsot puta CEM Tuliram Ronghang mai along jai.
Lahai asai jongsi tang-etlo pulote Assam state arlo kedo a district angbong Karbi Anglong ningkan hini kethom angnong kachingthur nai a district manpo pusi minister Dr. Himanta Biswa Sharma jai.
Prapjin pen Bokajan along 200 bedded Hospital kimpo, Donkamokam along district Civil hospital ta kimpo. Diphu along kikim bom Hill Medical College non phant 60 an kikim kerang asai tang etlo. Lasi non kevangji Chiti kali Pre achiklo malom pen pangchengpo. Laso along 1000 anbak grade III pen Grade IV a chokomar doji. Lahai achokomar doa-an ke Karbi Anglong arlo loh kethek ariso ejang atum aphansi pi-etji, isinatta angtan district atum aphan pipe puta Minister Dr. Sharma jai. Lahai a chokomar kipiji aphan non kevangji Jangmi achiklo kijutsi arui malom birta aloh heihui along chokomar anghoi aphan pangdakpo puta jai.
Laso Hill medical college along B.Sc Nursing, Dental College kapado ponji aphan netum matha bom lo. La-an chot kali Engineering college lapen Diphu along mat Hill university kapangniji aphan netum chingvai bom lo lapen lahai alam non kevangji Assembly session along kedengji aphanta chisik bom lo.
TET asatlang Karbi Anglong Autonomous Council pen enpo, appointment lapen bainong ta Council pensi pipo, netum ke Council along tangka nangpale chotpo puta jai.  Ajahak atum pen kapachethang Grade III pen Grade IV chokomar anghoi aphan SIU nangji pu alam ke ahok kali. Grade III lapen Grade IV aphan SIU nangne, lasi grade III pen Grade IV anghoi kejoi kedo anta Council atum pensi interview en pen anghoi ta pekpo. Lahai alam pen ke ratchari pathu nangne lo puta Dr. Himanta Biswa Sharma mai along jai.
Direct funding aphanta netum pen central government aphan chingki etlo, athe Direct funding along netum thangta kipu dunji alam ave puta Dr. Himanta Biswa Sharma jai.
Alangli pen Congress atum aphan tengkheng, Congress atum ke kevar tang sika 500 pen sika 1000 aloh ason lo. Laso ajoksi nonputa Congress atum sika 500 lapen 1000 kelar alam pensi nonputa chiru bom lo. Congress atum kedamtang alam pensi chiru lo seta BJP atum ke kevangji arni kachingthur asai kapapleng thekji lapen keklemji aphansi mang heman bom lo. Congress atum family politic kapathe alamta alangli mai along jai.